Waxaa la yidhi beri, oday baa safar u baxay, isagoo sita laba ubbo oo subag ah. Labadii ubbo xadhig buu siddooyinka u sudhay, dabadeed degtuu kala riday (xagga hore iyo dambe ayuu ka kala laalaadiyey), wuxuuna cagta saaray waddadii.

Haddaba, odaygii wuu fikiray oo naftiisuu la sheekaystay. Wuxuu ku hamiyey isagoo lacagtii subagga ku soo iibiyey qaalmo geel ah. Sannado ka dibna qaalmihii tarmeen oo geeliisu gaadhay laba boqol oo halaad.

Dabadeedna geelii isku batay oo ay hal xero qaadi kari weyday. Wuxuu u kala ooday labo xero, laba baaraqab ayuu ku kala daray. Wuxuu arkayaa labadii baarqab oo bawdka iskaga soo booday oo gorodda is daray. Wuxuu is odhanayaa kala celi. Wuu boodayaa oo wuxuu odhanayaa "dooh". Labadii ubbo ayaa isu soo wareegay oo isku dhacay. Halkaas bayna ku jajabeen subaggiina ku daatay. Odaygii hankiisina halkaas buu ku burburay oo ay mahadho ka raacday.

Ereymacnayn

1. Ubbo: weel subag lagu shubto.
2. Subag: dareere laga saaro caanaha ka dib kolka la gadhoodhiyo ee la lulo, dufan, iidaan, oon xoolaad.
3. Hammi: rabitaan, higsi.
4. Qaalmo: geel ama lo' da' yar, aaran.
5. Hal: neef geel ah oo dheddig.
6. Xero: meel oodan oo xoolo lagu xareeyo.
7. Gorod: qaarka hore.
8. Baarqaab: awr qoodh ah oo geela lagu daray si uu uga nirgo dhalo ama u rimiyo.
9. Dar: 1) wax ku dhex qas wax kale, laba shay meel isugu gee, isku dar, 2) meel biyo loogu shubo xoolaha, 3) weel dareere dhex geli oo ku qaad, 4) awr geel ku sii dhex daa si uu u rimiyo.

Duluc
Hammigaagu yaanu noqonin, mid haamaha kaa jajabiya.