Waxa la yidhi beri bay abaar daran oo duunyo ku hoobatay ka dhacday degaannadii xoolaha lagu xerrin jirey. Waa xilli xun oo xuluushii xuska ka idlaatay, wadaani arlada xaab qaadaynin, habaaska diisha iyo waddooyinka laga arooro ku liqayo, ayaa waxa la yidhi oday iyo wiilashiisii goob cidla' ah kaga dhaqaaqeen sac ay lahaayeen oo itaal yari la hinqan kari waayey kolkay u waayeen awood ay ku qaadaan.

Sida lagu "yaqaanno" lo'du kolkay ruqe noqoto ma kici karto "haddaan" dabada la qaban ama aan intii "hoggaan" ama xarig hareeraha lagaga duubo la qaadin.

Wax yar markay ka sii socdeen welina ayna ka libdhin ayuu odaygii dib u jalleecay sicii. Wuxuu arkay dad safar ah oo ku urusan sicii oo raba inay gawracaan si ay u qashaan.

Odaygii kolkuu arkay safarkii oo sicii gawracaya, wiilashiisii ayuu ku yari war saceennii oo dhalayaan arkayaaye gabbada oo suga intuu dhalayo. Kolkuu safarkii birta mariyeen sicii ayuu odaygii ku yiri baa la yiri wiilashiisii "saceennii wuu dhalaye soo baxa!".

Way soo ordeen iyagoo leh sacayagii hebel baad gawracdeen…sacannagii baad qasheen. Halkiibaa gorodda la is la galay oo ay xaaladdu ir iyo ir gaadhay, ugu dambayntii safarkii ayaa laga garhelay oo laga magdhebay sicii.

Ereymacnayn

1. Xerrin: xoolo rarid, ku hayn meel ka baxsan reeraha siiba geela, horwaynin."xasuus baa geel lagu xerriyaa" maahmaah.
2. Xuluul: caws ka dhex baxa geedaha, xusaska, musaska iyo oddaha. Caws ku dhex hadha meelo ayna xooluhu ka gawsan karin oo gacanta looguro xilliyada abaarta ah ee uu bannaanku xaalufo.
3. Xus: meel dhir qarisay, xidh, juuq, kayn, jiq."xarragoy xus igu tuur, faanaw far iga jebi" halqabsi
4. Wadaan: agab ka samaysan harag la aslay, intii xahdig-dawlis lagu xidho biyaha lagaga soo saaro ceelka, lagu waraabiyo dad iyo duunyo, yeel."wadaani xaab kama qaaddo meel heblaayo" halqabsi lagu cabbiro abaarta daran.
5. Xaab: jalawga, caleenta qallashay iyo cawska yaalla geedaha hoostooda ama dhulka.
6. Ruqe: neef lo' ah oo taag yari la kici kari waayey, la fadhiistay weyd, tabargab. "ruqe ninkii lahaa ku fadhiyo ma kacdo" maahmaah
7. Hinqo: kicitaan isku day, qaarka hore la kac, wax yar kor u kac.
8. Libidh: aragtida ka bax, qarsoon, sii durug, bildhaantaada ishu ha waydo.
9. Gorod: qaarka hore, qoorta oo madaxa lagu daray.
10. Garhel: hel gar, garwshiinyo hel, in gardarro lagugu waayo, dembi ka saliim noqo.
11. Magdhow: ruux dhib loo gaystay, dhibbane ah, xoolaha la siiyo, dhiig, diyo, mag, badhigooyo.

Duluc
Ha ku dhaqaaqin hawlaan laguu dirin! Intaanad falin ka fiirso.