Beri baa waxa la yidhi, nin odayaashii hore ee xishoodka badnaa ka mid ahaa ayaa isagoo dadweyne la fadhiya neefi ka fakatay (dhuuso). Siduu dhaqanku ahaa wuxuu u arkay inuu khashifmay oo ay sharaftiisii dhimatay mar hadday shir dhexdii dhuuso kaga fakatay.

Dabadeedna wuxuu ku yidhi dadkii uu la fadhiyey “aniga iyo dabaday isu laaban” taas oo ujeeddadeedu tahay, aniga dabadaydu meel cidla' ah ayaannu ku xisaabtami doonnaa.

Dabadeed shirkii kolkuu dhammaaday ee la kala socday ayuu odaygii xidh cidla' ah la galay dabadiisii, dabadeedna aad buu u canaantay ilaa heer uu mindi ku jeexjeexay! Wixii intaa ka dambeeyey “aniga dabaday isu laaban” waxay noqotay maahmaah caan ah oo lagu soo halqabsado.

Ereymacnayn

1. Xishood: (-ka), sarriig, qajil
2. Dadweyne: (-ha), dad badan, bulsho, ummad
3. Khashif: (fal), shaac ka qaad, sir qarsoon sheeg, la kulan waji-gabax, sharafrid, qashif, kashif
4. Sharaf: (-ta), xushmad, haybad, dadnimo, raganimo
5. Neef: (-ta), 1) hawo, gaar ahaan ta ka soo baxda sanka, 2) dhuuso
6. dhuuso: (-da), neef ur qadhmuun leh oo ka soo baxda dabada dadka
7. Dabo: (-da), 1) futo, 2) wax ama shay dhammaadkii, salki
8. Laaban: isu hadhan, isu dambayn, isa sugi, is xisaabin
9. Cidla': (-da), meel aan cidi joogin, ciirsila'
10. Xisaabtan: (-ka), wax is weydiin
11. Shir: (-ka), kulan, isu imaatin
12. Oday: (-ga), waayeel lab, duq, waayaale
13. Xidh: (-ka), kayn, juuq, xir
14. Canaan: (-ta), Durraamasho
15. Jeexjeex: (fal), googoo, dildilllaaci
16. Maahmaah: (-da), tix hadal ah oo aad u gaban oo murti ka buuxdo, odhaah, halqabsi, hal-ku-dheg, halhays
17. Halqabso: (fal), hal-ku-dheg ka dhigo, ku maahmaah

Duluc
Ruux hadduu qaldamo waxa habboon in si gaar ah wax loogu sheego, sida nin kaasiba dad dhexdii dabadiisa uuna ugu qaawinin.